قصة حب روعة في الشارجة لا تفوتكم بسم الله الرحمن الرحيم
عرفتك من قبل ما اتعرف عليك ,,, رسمتك في خيالي حلم غالي
قبل عيني تشوفك والتقيك,,,, احبك يا خيالن في خيال
عبدالله : السلام عليكم
الشباب : عليكم السلاااااام هلاااا عبادي
عبدالله : اشحالكم شخباركم
الشباب : تمام تعال ايلس
عيسى ولد عم عبدالله : وينك بوحميد كل ما اتصل بك تيلفونك مغلق
عبدالله: لا ماشي كنت راقد
صقر : يلا شباب قموا انسير نتمشى
سالم : يلا عالاقل انغير جو
كلهم : يلا
شوق وعاشة بنات عم طالعات ويا ربيعاتهن
هدى اتسوق السيارة
شوق : هدو اوقفي عند أي كفتيريا يوعانه
عاشة : هيه والله انا بعد
وياخذون العشا ويسيرون بحيرة خالد
عبدالله : اف ملل
صقر : عبادي دق على أي رقم خلنا انلعوز الخلق شرات هييج المرة
عبدالله: اوكي
ويدق عبدالله على أي رقم وترد عليه وحدة صوتها ناعم
شوق : الو
عبدالله يسكت منصدم جنه سمع صوت بلبل
شوق : الو منو ؟
عبدالله: الو
شوق : هلا منو وياي ؟
عبدالله مرتبك : اختي تيلفون منو هذا
شوق : انت بغيت منو ؟
عبدالله : انا بغيت صقر
صقر : ههههههههههههههه
شوق : لا اخوي غلطان مب تيلفون صقر هذا
عبدالله : السموحة اختي
شوق : لا العفو ... باي
عبدالله : باي
صقر : خيبة بلاك جي ؟؟
عبدالله وهو يتذكر صوت شوق : لا ماشي بس رحت فيها
عيسى : ليكون تيلفون بنت
عبدالله : بنت ... اااااه لوتسمعون صوتها .. عصفور يغرد
عيسى : ايه عبود بلاك ( ويضحكون الشباب )
في نفس الوقت
عاشة : منو متصل شواقة
شوق : ما ادري واحد يبا صقر اونه
هدى : متفييج
احلام: يلا بنات الساعة عشر خلنا نرد بيوتنا
هدى : تو الناس خلنا نستانس
شوق : لا ما فينا نتأخر
وتوصل هدى كل وحدة بيتها وتروح عاشة ويا شوق وتبات في بيتهم
شوق وعاشة يالسات عالتلفزيون
محمد ولد عم عاشة وشوق وولد خالة شوق في نفس الوقت واخوها بالرضاعة . محمد امه توفت يوم انولد وهو عايش ويا ابوه وهو ولده الوحيد
الساعة 12 في الليل يدش محمد
محمد: السلام عليكم
شوق وعاشة : عليكم السلام
محمد : يالسات ما شاء الله
شوق : غريبة اليوم الخميس ومب طالع ويا ربعك
محمد : لا وين
شوق : تعال شوف الفلم روعة
محمد : لا ساير الحين وين امي خلود ( ام شوق )
شوق : راقدة شو تبا بها
محمد لا بس بسلم عليها .... مب مشكلة انا ساير
شوق وعاشة : الله وياك
وعقب شوي يرن تيلفون شوق ,, تشوف شوق الرقم وتستغرب
شوق : عواش نفس الرقم اللي اتصل في السيارة
عاشة: ردي بنشوف
شوق ترد: الو
عبدالله : مرحبا
شوق: مرحبتين هلا
عبدالله : ممكن اخذ من وقتج شوي
شوق مستغربة: خير
عبدالله مب عارف شو يقول : لا بس حبيت اسلم عليج
شوق : نعم ؟
عبدالله يتجرأ وبدون ما يحس بعمره : بصراحة أنا من أول ما سمعت صوتج ما ادري بشو حسيت
قلبي قام يدق بسرعة
شوق ساكتة ومستغربة
عبدالله : انا ابا اتعرف عليج ومستعد اني اسعدج
شوق : انت واحد ما تستحي على ويهك ( وتبند التيلفون )
شوق اتخبر عاشة بالسالفة كلها
عاشة : والله انه واحد متفييج ,,,, بس تدرين قوية هاي ماتستحي على ويهك
عبدالله يطرش لشوق مسج : تخطي عليه وانا اسامحك واتصبر واسمع حكي منك واداريه واكنه
عاشة : شفتي قلت لج
شوق: انزين شو كنتي تبيني اقول له
عاشة : اوكي اوكي خلنا من هالسالفة انا بسير ارقد مب متفيجة ايلس اسمع سوالفج
شوق : مالت عليج ما تنفعين سيري ارقدي وانا بعد بسير
عاشة : تصبحين على خير
شوق : وانتي من اهله
ترقد عاشة ،،،،، وتيلس شوق اتفكر بالسالفة اللي استوت
يوم الجمعه الساعة الصبح الساعة 10 شوق وعاشة متعودات انهن يتريقن كل جمعة في الكوفي شوب في أي مركز
شوق تسوق ماخذة سيارة امها BMW
شوق : يلا عواش أي مركز انسير
عاشة : شورايج انسير نتريق في الفردان وعقب نتمشى عالبحيرة شوي , الجوي روعة
شوق : الى هناك
وسارت شوق وعاشة الكوفي شوب
وهن يالسات يتريقن رن تيلفون شوق
شوق : عواش نفس الرقم
عاشة : ردي بنشوف شوعنده هالمرة
شوق معصبة وخايفة في نفس الوقت : الو نعم
عبدالله : اسف لأني البارحة متصل في وقت متاخر بس ما حبيت ارقد بدون ما اسمع صوتج
شوق: جنك تعديت حدودك
عبدالله : الله يخليج لا تضايجين
شوق: اخوي عيب اللي اتوونه
عبدالله :غصبا عني
شوق : عن هالحركات وهالسوالف
عبدالله: اوكي عطيني فرصة اقول اللي في خاطري
شوق : لا والله ,, كل هذا وبعدك تبا ترمس
عبدالله : ابا اتعرف عليج والله ما العب عليج والله اني جاد
شوق تبند التيلفون
عبدالله يرمس ولد عمه : عواس شكله ماشي امل
عيسى: حاول مرة اخرى هههههههههه
عبدالله : رح ,,, عمرك ما كنت جاد
عيسى : يا عمي شو تباني اقول لك ,,, خلها تولي
عبدالله : شو خلها تولي انا اباها
عيسى : كيفك انا قلت اللي عندي
عبدالله: ما منك فايدة
شوق : يلا عواش خلنا انرد البيت علو اخوي بيي الساعة 2
عاشة : يلا
شوق عندها اخو واحد اللي هو علي يداوم في الجيش
الساعة 2 الظهر
علي : السلام عليكم
الكل يرد السلام
ام علي : ولدي وصل
علي يحب راس ابوه وامه
علي : اشحالكن بنات
شوق وعاشة : تمام
علي : شواقة وين حمود اتصل به ما يرد؟
محمد يدخل : السلاااااام عليكم
ويردون السلام
محمد: اوه هذا علو
علي : هلا والله بو جسوم ( ويتخاشمون )
علي : وينك كل ما اتصل ما ترد
محمد : لا محول تيلفوني
ام علي : يلا عالغدا
عبدالله : عواس احس عمري غلطت يوم قلت لها هالرمسة
عيسى : وايد مهتم بالسالفة
عبدالله : ما ادري ليش
عيسى : ليكون تحبها
عبدالله : اتخيل
عيسى : اتصل بها
عبدالله : على مسئوليتك
عيسى : يلا اتصل
ويتصل عبدالله
شوق تشوف الرقم وهي يالسة تتغدى والكل يطالعها
علي : بلاج ردي
عاشة فهمت واشرت لها عسب اترد ومحد يشك فيها
شوق ترد : الو
عبدالله : اف ما بغيتي
شوق : هلا والله
عبدالله مستغرب ومستانس : اشحالج
شوق : تمام انت اشحالج ؟
عبدالله فهم السالفة: تمام .. عندج حد؟
شوق تضحك ضحة خوف وارتباك : هلا حبيبتي حد يدق هالوقت
عبدالله : اوكي اوكي فهمت عليج بخليج باي
شوق : باي
عاشة تبا اتغيير السالفة : شو الدوام وياك علو ؟
علي : والله اوكي الحمدلله
عاشة شافت شوق مرتبكة وقالت : اكيد هاي مريوم
شوق : ها هيه
عاشة : ما عندها سالفة
ويكملون غداهم
عبدالله : الله يخس ابليسك شو سويت
عيسى : ههههههههه انا ما يخصني
عبدالله : هيه الحين ما يخصك ,,,, توبة مرة ثانية ما باخذ رايك
عيسى: هههههههههههههه
الساعة 4 العصر
في غرفة شوق
شوق: تدرين عواش بتصل به وبأدبه
عاشة : لا تتهورين
شوق : شو لازم اوقه عند حده
عاشة : كيفج
شوق تتصل وعبدالله شاف الرقم ونقز
عبدالله : الو
شوق : انت شو .,,, شو اقول عنك ماتستحي ؟
عبدالله : والله اسف سامحيني مب قصدي
شوق استحت يوم قال سامحيني : اخوي والله عيب اللي اتسوونه
عبدالله : والله اسف
شوق : اخوي خلاص مافي داعي للاعتذار بس احسن انك ما اتدق على هالرقم
عبدالله : ليش انت قاسية ؟ ليش ما تحسين فيني؟
شوق منصدمة ومستغربة: نعم؟
عبدالله : انا اباج
شوق : يلا باي ( وتبند)
عاشة : شو قال؟
شوق مستغربة اول مرة يصير لها هالموقف
عاشة : شواقة بلاج ؟
شوق تخبر عاشة باللي استوا
عاشة : أي ريال بيذل عمره وبيتحمل وحدة اتقوله ما تستحي وترمسة بهالطريق وتبند التيلفون في ويهه
شوق : انزين شو تبيني اسوي كنت معصبة
عاشة : حتى لو معصبة
شوق : اذا ما سويت جي بياخذ عني فكرة
عاشة: ليش يهمج؟
شوق : انا ما ابا اوسخ اسمي جدام الناس
شوق يوصل لها مسج من عبدالله " اسف"
عاشة : حليله
شوق: والحين شو اسوي؟
عاشة : خلاص بعد شو
يظل عبدالله يتصل بشوق وشوق ما ترد عليه
ويطرش لها مسجات " حني علي يابنت الناس تراني انسان من قلب واحساس"
"قالوا ترى مالك امل في قربها لو يوم
ابعد وجن في دربها هذا هو المقسوم
قلت اتركوني واسكتوا وخلوا العتب واللوم
قدني غرقت فبحرها ولا عاد يفيد اللهم"
عبدالله شاف انه ما شي فايدة وطرش لها اخر مسج "سيلي يادموع عيني واحرقي حتى الجفون وابكي على اللي فارقوني ما اظنهم يردون"
حـــــــــــن قـــــــلـــــــب شـــــــــــــــوق
شوق : عواش ليش ما قام يتصل ولا حتى يطرش مسجات ؟
عاشة: هذا اللي كنت تبينه
شوق : اف بس خليني فحالي
عاشة: طاعوا .. ترمس عقب اتسكتني
في يوم من الايام
عبدالله طالع ويا ربعه قوم سالم ومنصور وصقر
سالم: عيل وين عواس
عبدالله مشغول قال عقب بيي
سالم : يعرف إنا في صحارى؟
عبدالله : هيه خبرته
منصور: هذو وصل
عيسى يسلم على ربعه: وينكم من متى ادور عليكم
صقر : نترياك عسب انسير نتعشى
عيسى: وانت مب هامنك غير بطنك يالدب،،،،،،، يلا نسير
وكل واحد يسولف ويا الثاني
عبدالله يرمس عيسى: عواس من زمان ما سمعت صوتها
عيسى : بعدك ما نسيتها؟
عبدالله : كيف انساها؟
عيسى : عقب كل اللي سوته
عبدالله : هيه يا اخي اكتشفت اني احبها كيف حبيتها بهالسهولة ما ادري؟
عيسى: انت اتحب؟؟ ما اصدق... اوكي اتصل بها
عبدالله: عقب كل هالفترة ؟
عيسى : سبحان الله يمكن ترد
عبدالله :بجرب بس على مسئوليتك
عيسى : يعمي على مسئوليتي بس اتصل
ويتصل عبدالله
شوق في بيت عمها اللي هو ابو عاشة منسدحة على الشبرية ويرن تيلفونها وقامت وخذت التيلفون ويوم شافت الرقم طارت من الفرحة وقالت : عواش هو
عاشة : بسم الله زيغتيني ردي انزين
شوق ترد: الو
عبدالله : اخيرا
شوق مسوية عمرها معصبة : نعم
عبدالله : ليش اتعيشيني في عذاب ،، ليش انا بعينج سراب
شوق : خير شو تبا؟
عبدالله : دخيلج حسي فيه ارفقي بحالي ترى حبج لقيته بالوريد وانتي عادي لو اغيب ولو دوم اتصل
شوق : انا اول مرة اشوف واحد يترجى وحدة ويذل عمره عسب اتسويله سالفة
عبدالله :ليش انا العب .. قلت لج انا جاد والله جاد
شوق: عقب كل اللي سويته فيك ؟
عبدالله : انا احــــــــــــــــبج
شوق شاقة الحلج وساكته
عبدالله : تسمعيني الو
شوق وبــــــكـــــل حنــــــــان: وينك انت من زمان؟
عبدالله مب مصدق عمره : ليش ؟؟ اشتقتي لي ؟
شوق : بصراحة .. هيه
عبدالله طاير من الفرحة وحاس ان ريوله مب شالتنه : والله؟؟
شوق وبرقة: من يوم قطعت عنا وما قمت تتصل وانا اترياك
عبدالله : ما اصدق انا اكيد احلم
شوق تضحك برقة
عبدالله : فديت هالضحكة والله
ويلسوا يسولفون ويسألون عن بعض وما يحسون بالوقت
وتمر الايام على هالحالة
طولت عليكم ..... خرص أكمل معاكم في حلقة ثانية
مدمنة .......
)..وبعدين الى يحب من متى يكلم الرجاجيل عن حبيبته لا ويخلي صاحبه يشوفها..والا انتم شايفين غير كذا 
